ICREA – Adikzioen arloko Ezagutzaren Kudeaketarako, Hausnarketa Etikorako eta Ebaluaziorako Ekimena (Katalunia)

Proiektuak ICREA, Iniciativa para la gestión del Conocimiento, la Reflexión ética y la Evaluación en el ámbito de las Adicciones (Adikzioen arloko Ezagutzaren Kudeaketarako, Hausnarketa Etikorako eta Ebaluaziorako Ekimena) izena du, eta, ebidentzian oinarrituta, adikzioak tratatzeko zentroetako profesionalen esku-hartzeei buruzko hausnarketa etikoa egituratu nahi du, batez ere Osasun eta Komunitatea Fundazioak (FSC) Katalunian dituen drogamenpekotasunaren tratamendu psikosozial intentsiboko zentroetakoena (komunitate terapeutikoak: “Can Coll” eta “Riera Major”, drogen mendekotasuna duten pertsonentzako gizarteratze-egoitza urbanoak eta Drogamenpekoen Gizarteratzerako Eguneko Zentroa), lantaldeen bidez, aplikatutako arretaren eta gizarte-esku-hartzearen kalitatea eta emaitzak hobetzen dituzten ekintzei buruzko erabaki informatuak hartu ahal izateko.

ICREAk laguntza jasotzen du esku-hartze eta gizarte-ekintzako erakunde, profesional eta boluntarioei berrikuntza eta ezagutza-transferentzia babesteko jarduera eta proiektuetarako diru-laguntzen deialditik (CONVO’24); deialdi hori egin du Generalitat de Catalunyako Gizarte Eskubideen Sailak.

 Proiektuak adikzioen arloko profesionalen hausnarketa etikoa eta jardunbide egokiak bultzatu nahi ditu, esku-hartzearen emaitzen azterketatik abiatuta, bai ebaluazio-sistema bera, bai jarduera profesionala eta ezagutza partekatuaren kudeaketa hobetzeko, une oro Genero Ikuspegi Intersekzionala (PDGI) txertatuz. Esku-hartzearekin eta haren emaitzekin lotutako jarduera horiek sustatzeko, hausnarketa etikorako Laguntza Batzordea sortuko da, FSCren egituran egonkorra izango dena eta lantaldeen zeharkako parte-hartzea izango duena.

Ekimenak jarduketa-maila hauek ditu:

• 1. MAILA: Hausnarketa etikorako eta ebaluaziorako laguntza (emaitzen azterketa eta tresnen garapena)
• 2. MAILA: Profesionalentzako laguntza (Laguntza Batzordea eta adikzioen arloko Batzorde Etikoa sortzea)
• 3. MAILA: ICREAren zabalkundea (FSCko eta gizarte-ekintzako beste erakunde batzuetako profesionalak)
• 4. MAILA: Balorazioa (protokoloak, ondorioak eta ebaluazio-tresnen egokitzapenak egitea)

Jarduerak aurrez aurre eta birtualki egingo dira. Horretarako, eztabaida-foroak, hausnarketa etikoko saioak, ezagutza trukatzeko taldeak eta berdinen arteko ikaskuntza antolatuko dira. Batez ere GKEentzako lizentzia duen Microsoft 365 ingurunea erabiliko da (tresnak, hala nola Teams, Sharepoint, Forms eta Engage). Era berean, gogobetetze-eskalak digitalizatu egingo dira, gerora analisi kualitatiboa errazteko.

Era berean, proiektua FSCren I.D.E.A.S Programaren (Informazioa, Diagnostikoa, Ebaluazioa, Arreta eta Jarraipena) barruan kokatzen da; programa horren xedea da ebidentzian oinarritutako ebaluazio-sistema integratu eta digitalizatu bat garatzea, FSCk kudeatutako zerbitzu eta programen eraginkortasuna neurtzeko, kalitatearen sustapenaren eta etengabeko hobekuntzaren alde; sistema horrekin  informazio erabilgarria bilduko da eztabaida-taldeetan hausnarketa etikoa, jardunbide egokien trukea eta erabaki informatuak hartzea errazteko.

Batzorde nagusitik eta ICREAren lantaldeetatik, ebaluatzearen garrantzia azpimarratzen da, ebidentziatik eta emaitzetatik esku hartu ahal izateko, ikuspegi asistentzialistak atzean utzita. Ildo horretan, nabarmendu nahi da ebaluazioa dela esku-hartzeari buruz hausnartzeko eta jardunbide profesional egokiak detektatzeko eta trukatzeko oinarria. Horrela, adikzioak tratatzeko zentroetan arreta hobetzeko bidean aurrera egiteko aukera gauzatzen da.