ACOFAMT - Tutoretzapeko adingabeak familia arrotzetan aldi baterako eta/edo larrialdizhartzeko zerbitzua (Murtziako Eskualdea)

Tutoretzapeko adingabeak familia arrotzetan aldi baterako eta/edo larrialdiz hartzeko zerbitzuak alternatiba bat eskaini nahi dio Murtziako Gobernuaren tutoretzapean dauden eta, beraz, jatorrizko familiatik aldendu diren adingabeen instituzionalizazioari. Programari esker, haurrek eta nerabeek familia-gune bero, hurbil eta prestatu bat aurki dezakete, haiek hartu eta haien oinarrizko behar guztiak asetzen saiatuko dena, ingurune indibidualizatu batean eta haien egoeraren arabera, haientzat alternatibarik egokiena zehazten den bitartean. Eskari horrek haurren babesaren arloko Europako joerari erantzuten dio eta harekin bat dator, familia-gune normalizatua adingabe ororen garapen integralerako erraztaile nagusitzat hartzen baitu. 

Zerbitzua Murtziako Eskualdeko Autonomia Erkidegoak edo beste Babes Erakunde Publiko batek ezarritako babes-neurrien mende dauden haur eta nerabeei zuzentzen zaie, familia arrotz batean aldi baterako familia-harreran daudenei eta Murtziako Autonomia Erkidegoan bizi direnei, bai eta familia arrotz batean aldi baterako harrera izan dezaketen eta babesgabetasun-egoeran dauden beste haur eta nerabe batzuei ere. 

Halaber, Zerbitzuaren erabiltzaileak dira adingabeak aldi baterako hartzeko eskaintzen diren pertsonak, adingabeen zaintza harrera-familia gisa dutenak, bai eta gurasoak eta jatorrizko familia-sistemako kideak ere, adingabearen beharren, haren hezkuntza-planaren eta banakako esku-hartze proiektuaren arabera zehazten direnak. 

Horrela, Zerbitzua 0 eta 17 urte bitarteko tutoretzapeko haur eta nerabeei zuzentzen zaie. Anai-arrebak elkarrekin egon daitezke, haientzat egokia bada eta haien banakako hezkuntza-proiektuarekin bat badator.  

Zerbitzuan, halaber, desgaitasun arina (fisikoa eta/edo psikikoa) duten eta/edo harrera-familiaren eremutik heldu daitezkeen jokabide-arazoak dituzten adingabeak artatu daitezke. 

Baldintza horiek betetzen dituzten adingabeak (hilean 30 kasu inguru artatzen dira) zentroetako Talde Teknikoek bideratzen dituzte Zerbitzura, Unitate Tekniko Arduradunarekin koordinatuta; unitate hori Murtziako Eskualdeko Autonomia Erkidegoko Familien eta Adingabeen Babeserako Zuzendaritza Nagusiaren mende dago. 

Jarraian, Zerbitzu hau definitzen duten ezaugarriak zerrendatzen dira: 

1. Adingabea jatorrizko familiara itzultzea erraztea une oro, arretaz lan eginez eta jatorrizko familia haren hobekuntzan eta garapenean aktiboki inplikatuz, aldatzeko aukerak emanez eta adingabearen tutoretza eragin zuten adierazleak desagerraraztea sustatuz. Gurasoen gaitasuna berreskuratzea ezinezkoa bada, talde teknikoak, Erakunde Publikoarekin etengabe koordinatuta, beste alternatiba batzuk errazten eta sustatzen ditu adingabearentzat. 
2. Adingabea hartzeko hautatutako harrera-familia profil espezifikoaren arabera lotzen da zuzenean, maxima hau betez: “ez da familia batentzako adingabe bat bilatzen, adingabe batentzako familia bat baizik”. 
3. Adingabearen zaintza Zerbitzuak hautatutako familiaren esku uzten da; tutoretza, berriz, haurren babesaren arloan eskumena duen Erakunde Publikoarena da. 
4. Harrera-familiek ordainsari ekonomikoa jasotzen dute, eta hori handitu egiten da hartutako haur eta nerabeen kopuruaren (anai-arreba taldeak) eta haien egoera berezien (desgaitasuna) arabera.  
5. Zerbitzuaren berezitasun gisa nabarmendu daiteke harrerak ez duela 2 urte (24 hilabete) gainditzen, salbu eta adingabearen interes gorenak neurria luzatzea gomendatzen badu, familiara laster eta berehala itzultzea aurreikusten delako edo behin betiko beste babes-neurri bat hartzen delako. Aldi horretan, talde teknikoak, Unitate Tekniko Arduradunarekin koordinatuta, alternatiba argi eta egokia ezarri behar du adingabearentzat (itzulera, adopzio-helburuko zaintza-eskuordetzera bideratzea edo beste alternatiba batzuk). 
6. Hautatutako familiak Zerbitzuaren parte integral bihurtzen dira, eta proposatzen zaizkien jarduera guztietan parte hartzen dute. 
7. Etengabeko prestakuntza-saioak egiten dira, familien etengabeko atzeraelikadura-prozesua eta adingabearen garapen-arlo guztiei buruzko aldizkako ikaskuntza errazteko; horrela, haien profil erdi-profesionalasustatzen da, eta harrera-familiaren figura profesionalizatzeko bidean aurrera egiten da. 
8. Aldi berean, zerbitzuko talde teknikoak zaindu behar du adingabearen bizitzarekin lotutako beste baliabide batzuekin etengabeko koordinazio-prozesua egon dadin, hasiera batean Familien eta Adingabeen Babeserako Zuzendaritza Nagusiak ezartzen dituen jarraibideak eta orientabideak kontuan hartuta.