Noctambul@s - Aisialdiko testuinguruetan drogen kontsumoaren eta sexu-abusuen arteko harremanari buruzko behatokia, prestakuntza eta esku-hartzea

Noctámbul@s proiektua behatoki batetik abiatu zen, eta behatoki horren helburua hau da: gaueko aisialdiko testuinguruetan drogen kontsumoaren, jazarpenaren eta sexu-abusuen artean dagoen harremanean sakontzea. Haren azterlanak arriskuen prebentzio- eta murrizketa-ildo batean kokatzen dira, esku-hartze unibertsaleko eta selektiboko ekintzetan oinarritutako ikuspegi batetik abiatuta.

Proiektu hau Osasun Ministerioaren Drogen gaineko Plan Nazionalak finantzatzen du, eta Madrilgo Erkidegoan, Valentziako Erkidegoan eta Katalunian garatzen da.

Sexu-abusuak eta aisialdiko testuinguruetan horiekiko dagoen tolerantzia handia dira abusuarekin ez ezik, aisialdiko testuinguruetako drogen kontsumoarekin berarekin ere lotutako arrisku nagusietako bat. Droga-arloan historikoki izan den genero-ikuspegiaren falta pixkanaka arintzen joan da emakume drogamenpekoen tratamenduaren eremuan; oraindik bide luzea dago egiteko, baina aurrera egin dugu. Hala ere, orain arte, prebentzio-testuinguruetan eta/edo arriskuak murrizteko testuinguruetan, sexu-indarkeriaren berezitasuna ez da aipatu, nahiz eta –paradoxikoki, eta aurkitutako emaitzen arabera– “gauaren” arrisku nagusietako bat izan, batez ere emakumeentzat. Gure gizarteak sexu-izaerako jokabide abusiboekiko duen tolerantzia handiak –batez ere drogen eraginpean– fenomenoa ezkutatzen lagundu du. Horregatik, Osasun eta Komunitatea Fundazioak, behatoki honen bidez, lan-ildo egonkor eta espezifiko bat mantendu nahi du, analisian eta esku-hartze prebentiboan oinarrituta, gazteen begirada aldatu nahi duena, baina baita testuinguru horietan esku hartzen duten profesionalena ere (bai aisialdiaren industriatik, bai arriskuen prebentziotik/murrizketatik).

Behatoki egonkor eta etengabe eguneratu bat ezarri nahi da, honako hau ahalbidetuko diguna:

• Gaur egungo gazteen aisialdiaren dinamikak eta haien aldaketak egituratzen dituzten gakoak etengabe eguneratzea, gaur egun gazteen aisialdia, drogen kontsumoa eta ohitura horiek sexu-izaerako abusuekin duten harremana zein joerak egituratzen dituzten ulertzeko, eta, horrela, nora doazen jakiteko.
• Gazteen artean substantzia psikoaktiboekiko jarrerak, erabilerak eta ohiturak ulertzea, bai eta horiek sexu-abusuaren eta sexu-indarkeriaren dinamikekin duten harremana ere.
• Aisialdiko testuinguruetan drogen kontsumoak eta sexu-abusuek eragindako arriskuak murrizteko ideia prebentiboen zerrenda bat lortzea.

Era berean, Osasun eta Komunitatea Fundazioak (FSC) bere Noctámbul@s Behatokiaren bidez esku-hartze, azterlan eta prestakuntza-ekintza batzuk eskaintzen dizkie udalei, udal-baliabideei, aisialdiko testuinguruetan espezializatutako erakundeei eta beste toki-erakunde batzuei, aisialdiko guneetan gerta daitezkeen sexu-indarkeriei aurre egiteko.

Esku-hartzeen kolektibo nagusia bai toki-erakundeetako profesionalak, bai aisialdiko testuinguruetan hezitzaile espezializatu gisa jarduten duten eragileak dira. Horrela, hainbat ekintza egin dira, hala nola “Aisialdiko guneetako sexu-indarkeriak prebenitzeko eragile gazteak”, “Hezkidetza aisialdiaren munduan: indarkeria matxistak prebenitzeko tresnak”, ikastaroak eta prestakuntza-tailerrak Kanarietan, Aragoin, Madrilen, Valentziako Erkidegoan, Asturiasen, Galizian, Andaluzian eta beste autonomia-erkidego batzuetan; halaber, parte hartu da Europako azterlan honetan: Sexism Free Night.